Tak pernah sanggup sensi
Karna aku cukup sexy
Tak perlu jadi sungkan
Asal kau punya selipan

Aku ini bukannya pelit
Tapi kau terlalu ngirit
Kalau rupiah tinggal seiprit
Cuma boleh icip sedikit

________

Jakarta dingin 091107
pengaruh curhat, si Pria Jalang

Aku merasa terjebak
Dan ia terbahak
Aku pun di gelandang
Dengan badan setengah telanjang

Dia mengancam
Akupun diam
Dia teriak
Aku mulai muak

Hanya setengah linting
Bikin aku hampir sinting
Ku tawarkan rupiah
Mukanya pun merah

Peraturan yang ada tak lagi jadi panutan
Saat kantungnya penuh dengan jutaan

____
071107
saat teringat si sialan berseragam

Di sini
Dan hanya sendiri
Berdiam diri
Dan terus menanti

Duhai pujaan hati tersayang
Semoga besok ia datang
Membawakan Cucur sekeranjang
Amin …

211007
*Saat turun hujan. saat menunggu giliran

Istriku meracau
Bang, mana THRmu tahun ini ?
Belum turun, jawabku

Istriku meracau
Bang, Anakmu dan Istrimu belum punya baju baru
THR belum turun, jawabku

Istriku meracau
Bang, jadi gak kita mudik ?
Kereta padat, tiket pesawat mahal
dan THRku belum turun, jawabku

Istriku meracau dan terus meracau
Aarrgggg ….. pening kepalaku
Kalau besok THRku turun
Ku habiskan sajalah buat beli Istri baru !

Jakarta, 101007

Saat Istri kawanku terus meracau 

Akhirnye hari nyang aye tunggu-tunggu dateng juga. Ba’da Isya nanti Bang Ahmad bakal dateng kerumeh aye buat nemuin Babe. Ah .. semoge aje Bang Ahmad bise ngambil hatinye Babe.

Dari ba’da Magrib aye dah rapih, dah wangi dan udeh mandi pastinye, nih malem aye pengen tampil cantik biar Bang Ahmad makin cinte ma aye dan makin mantep aje mo ngelamar aye. Nih malem aye pake baju biru kesayangan aye trus aye juge pake jilbab biru nyang tempo hari di beliin ame Bang Ahmad. Duh … aye jadi makin cantik aje.

“Fatimeeeeeeeh …. !!” suare Babe nyang super ngebas bikin aye kaget.

“Iye .. Be, bentar” Duh si Babe ngeganggu orang lagi dandan aje. Aye langsung buru-buru nyamperin Babe nyang lagi asik duduk di bawah pu’un sengon.

“Mane die dedemenan lo?, dah gini ari belom keliatan batang idungnye, jadi kagak die dateng kemari?!” Babe nyang lagi nyantai kaliatannye juga kagak sabar pingin liat calon mantunye. Hehhehe

“Jadi kok Be .. Bang Ahmad pasti jadi dateng” ati aye jadi deg-degan, aye kuatir Bang Ahmad kenape-kenape di jalan.

***

“Assalamualaikum … “ Nah .. ntu die Bang Ahmad dateng, aye langsung buru-buru kedepan bukain pintu bakal Bang Ahmad, sementare Babe buntutin aye dari belakang di ikutin ma Enyak.

“Waalaikumsalam … eh Abang,” aye rada manyun nemuin Bang Ahmad lantaran die telat 10 menit, aye protes ame Bang Ahmad soalnye kagak biase-biasenye die telat, setau aye Bang Ahmad ntu orang nyang tepat waktu kagak pernah ngaret sedikitpun, tapi nih malem tumben-tumbenan si Abang telat.

“Neng .. jangan manyun gitu dong ah, maap ye Abang rada telat soalnye tadi ada urusan bentar di tengah jalan. Eh iye nih, abang bawaain kerak telor ame lepet kesukaanye si Babe.” ah … si Abang nyoba ngerayu aye, tapi kagak tau ngapa aye paling kagak bisa dah marah ame Bang Ahmad.

Langsung aje aye nyuruh Bang Ahmad masuk, Babe ame Enyak dah nunggu di ruang tamu, sementara aye masuk ke dapur buat bikinin minum. Jantung aye dag dig dug aje dari tadi, aye takut kalo Babe bakal marahin Bang Ahmad lantaran die dah macarin anak gadisnye.

Saat aye balik ke ruang tamu sambil baawin minum ame nyuguhin kue nyang Bang Ahmad bawa, aye ngeliat Babe masih diem aja, die masih asik ame rokok kreteknye, dan Enyak sedari tadi sok-sokan basa basi ame si Bang Ahmad. Duh … aye jadi makin deg-degan aje, si Babe ngape jadi diem aje ye, pan die nyang nyuruh Bang Ahmad dateng kemari, aye jadi kesian ngeliat Bang Ahmad duduknye jadi gelisah gitu udah kayak orang sakit ambeyen.

“Di minum Bang tehnye” aye nyoba ncairin suasane, aye jadi bingun sendiri. Mata Babe ngeliatin Bang Ahmad mulu, hehhehe .. aye rase Babe juga terpanah ame ketampanan pacar aye, dan si Enayk dari tadi cume mesem-mesem aje.

“Iye .. Abang minum ye, Be .. tehnye aye minum ye?” Bang Ahmad mulai nyoba basa-basi ame Babe.

“Hhhmmm .. iye, minum dah” jawab Babe datar. Etdah si Babe dah kayak orang kesambet diem aje, biasenye juga die nyerocos aje.

“Name lo Ahmad?” tanye si Babe, hihiih … akhirnye Babe ngomong juga.

“Iye Be, name aye Ahmad” jawab si Abang dengan suarenye nyang lantang.

“Kate anak gue si Fatimeh, lo pacaran ame die? Dah berapa lame lo macarin anak gue?” Babe aye emang terkenal galak, ape lagi kalo die lagi beradepan ame orang yang lagi demen ame aye, ampun dah lagaknye si Babe jadi sok jaim gitu deh.

“Iye Be .. aye emang pacarnye fatimeh, aye juga dah lame demen ame die, sejak die Sanawiyah aye dah suka bener ma Fatimeh, cume waktu ntu aye belom berani ngutarain perasaan hati aye, nah pas Fatimeh lulus Aliyah baru deh aye berani bilang kalo aye cinte ame sayang ma die.” Kelar ngejawab pertanyaan si Babe, Bang Ahmad langsung natap aye. Aduuh … ternyate si Abang dari dulu dah suka juga ma ye. Bang Ahmad masih natap aye, sementara aye jadi senyum-senyum sambil malu-malu tapi mau.

“Denger ye … siape tadi name lo?”

“Ahmad .. Be”

“Iye … Ahmad, lo tau pan si Fatimeh ntu anak gue atu-atunye, lo tau juga pan kalo banyak perjaka nyang suka ame die, dari anak lurah ampe anak RT pernah pade nyoba dateng kemari bakal ngelamar Fatimeh. Dan lo tau kagak ? gue tau mereka siape tapi gue kagak mao sembarang nerime lamaran orang, ape lagi elo, gue lom tau elu siape, orang tue lo siape, kerjaan lo ape, haram ape kagak duit nyang lu punye?” begini nih Babe aye, kalo dah nyerocos dah kayak mercon.

Mendengar perkataan Babe, Bang Ahmad cume diem, tapi aye tau Bang Ahmad kagak bakal gentar kalo Cuma perkara Babe lom kenal ma die. Tapi jujur aje lantaran omongan Babe nyang kayak gitu aye jadi gak enak ati ma Bang Ahmad.

“Maap Be, mungkin aye udeh lancang, karena aye demen ame Fatimeh anak Babe, aye juga emang bukan anak-anak siape-siape, Babe aye bukan orang kelurahan atau pejabat lainye, kerjaan aye juga cume kayak gitu aje, aye bukan orang kantoran, tapi Inssayaallah bulan depan aye bakal ngajar di TPA, dan Alahamdulillah rejeki nyang aye dapetin halal, Insyaallah.” Ini nyang aye suka dari Bang Ahmad, pantang bagi die buat mundur,, meskipun Babe aye dah ngomong nyang rada nyinggung perasaannye tapi Bang Ahmad kagak kesel die tetep tenang ngadepin Babe aye nyang kalo ngomong emang suka asal goblek.

Sedari tadi Enyak aye cume diem aje nyimak Babe ame Bang Ahmad ngobrol, sementara aye juga tetep keliatan tenang meski ati aye ketar-ketir.

“Ahmad … kalo boleh Nyak tau siape name Babe lo?”

“Babe aye namenye Babe Jalum Nyak” jawab Bang Ahmad dengan di sertai senyum manisnye.

“Ape ???!!! ….. Jalum ? Jalum nyang punye toko kembang ntu? Jalum nyang tinggal di kampung rawa?” pertanyaan Babe dah kayak orang nyang lagi kaget, duh … ade ape lagi ye, jangan-jangan Babe dah kenal ame Babenye Bang Ahmad, tapi kok kayaknye reaksi Babe kayak kagak suka gitu ye.

“Iye … Babe jalum nyang tukang kembang ntu Babe aye, dan aye emang tinggal di kampung rawa. Jadi Babenye Fatimeh dah kenal ame Babe aye?” Bang Ahmad melemparkan senyumanye ke aye, keliatan banget kalo Bang Ahmad seneng.

“Iye … gue kenal ame Babe lo, dan lu kudu tau, Babe lu itu pernah ngerebut pacar gue, dan Babe lo ntu musuh bebuyutan gue dari dulu.”

Dulu Enyak emang pernah cerite ame aye soal kisah cintenye tempo dulu, ya … kagak jauh beda ame aye. Enyak dulunye adalah seorang gadis kampung nyang baik hati, dan cantik pula. Saat ntu ada due orang perjaka nyang naksir ame Enyak, trus akhirnye Enyak milih Babe buat di jadiin pacarnye, dan di tengah jalinan asmara Enyak ame Babe, muncul lah seorang perjaka lainye nyang berusaha untuk ngerebut Enyak dari Babe. Dan sekarang aye tau rupenye Babenye Bang Ahmad nyang pernah ngerejokin hubungan asmara Nyak ame Babe aye.

Di Rumeh Haji Samsul (Bokapnye si Juki) —

“Boooooos!, Bos Jukiiiiii!” Si Japra anak buahnye Juki kelihatan lari tergopoh-gopoh kayak orang abis ngeliat setan. Kontan seisi rumah pade melengos ke arah si Japra.
Hari ini kebetulan Haji Samsul ame Enyaknye si Juki kagak ade di rumeh. Nyang ade cuman Juki, Kubil (tangan kanannye Juki), dan Ismail ade kandung si Juki.

“hhh hah hh hah hh!” Japra keliatan ngap-ngapan, mukenye rada pucet, mungkin kekurangan oksigen. Tangannya sebentar megangin dada, sebentar ngusep keringet di kepala.

Secepet kilat Juki ame Kubil keluar nyamperin tu anak. “Ngape lo Pra, tumben lari-larian gak jelas gituh?” Tanye Juki penasaran.

Si Juki ni anak Betawi aseli nyang kehidupannye bikin anak-anak kampung Betawi manapun ngiri. Gimane gak ngiri mulain brojol ke dunie ampe sekarang hidupnye kagak perne suseh, mo makan tersedie, waktu ke sekole dulu gak perlu kepanasan abisnye pan die dianter jemput ame sopir babenye pake mobil ber-ac. Mo tipi gede, leptop paling canggih, motor keluaran terbaru, henpon nyang paling kinclong tinggal tunjuk. Babe ame Enyaknye bener-bener manjain die banget. Apalagi sekarang, disaat anak2 kuliah nyang baru lulus kesono kemari ngirim lamaran kerje, die mah enak aje tinggal ngejogrok di perusahaan Babenye. Mo berangkat ngantor ape kagak, seenak jidatnye aje dah. Ngiri kan lo?.

(Wokeh balik lagi ke Japra ^_^.)

“Boos… aye punye berita penting nih, Babenya Fatime ngundang si Ahmad ke rumehnye tuuh. Bisa gawat ni bos kalo ampe babenye Time ngaminin hubungan anaknye ame si Ahmad!” si Japra ngejelasin sambil nunduk megangin lutut layaknye orang nyang lagi ruku’, rupanye si Japra masih puyeng gara-gara lari-larian di siang bolong.

“Hah! Nyang bener lo Pra?, waduh setau gue dari kemaren-kemaren kan Babenye Timeh kaga sudi ketemu ame si Ahmad. Ade ape yeh? Perasaan gue jadi kagak enak nih, jangan-jangan Babenye mulain demen ame si Ahmad. Wah ini kagak bisa dibiarin!”.

Juki jalan mondar-mandir, jidatnye semakin berkeriput, sesekali die garuk-garuk kepala padahal palanye kagak gatel. Kelihatannye Juki lagi berpikir keras gimane caranye supaye Ahmad kagak berhasil nemuin Babenye Fatime.

“Kapan tuh si Ahmad disuruh nemuin Babenye Time?” Tanye Juki ke Japra
“Malem minggu ini bos, ntu berarti besok malem kan?” Jawab Japra dengan nafas yang sudah stabil.

“Naah! Gue punye ide nih. Eh Kubil! kali ini gue butuh bantuan lo. Lo kan jawara kampung sini, pastinye jurus-jurus silat lo kagak bise diremehin. Sebagai tangan kanan gue, lo musti bantuin gue untuk ngalangin si Ahmad nginjek rumehnye Fatime apapun caranye” seru si Juki sembari memperlihatkan senyum liciknye ke Kubil.

“Kalo aye sih mo ade sepuluh Ahmad kagak masaleh, nyang penting ininye Bos” sahut Kubil sambil gesekin jari telunjuk sama jempolnye jadi atu.

“Halaah itu mah keciil! Yang penting kerjaan lo beres dulu. Masa lo lupe gue siape? Nih si Juki anak betawi nyang paling kaya”. Si Juki mulain lupe diri.

“Kalo gitu hayo kite ke dalem nyusun rencana buat besok malem”. Juki dan anak buahnye akhirnye masuk lagi ke dalem rumeh.

Dari kejauhan Ismail, ade kandungnye si Juki mencium bau busuk rencane Abangnye untuk nyelakain si Ahmad.

“Ini gak bole ampe terjadi” dalem ati Mail bergumam. Diem-diem si Ismail masuk ke kamarnye nelpon si Ahmad untuk berhati-hati malem minggu nanti. Secara singkat Ismail menceritakan rencana kakaknye ke Ahmad.

Ismail, selain emang die dasarnye anak nyang baek, die juga adalah adik seperguruan Ahmad di perguruan silatnye Abah Fuad.

Selesai Mail ngomong ame si Ahmad, tiba-tiba bogem mentah Juki nyasar ke pipinye.
“Plakk!”. “Dasar ade kagak tau diri lo! Ngapain juga lo malah belain si Ahmad? Harusnye kan lo belain gue, abang lo sendiri?” Mail kagak sadar ternyata pembicaraanye sama Ahmad melalui telepon ketahuan .

“An***g lo!, dasar go***k!, bogem kedua dilemparkan lagi ke muke Mail, tapi kali ini Mail berhasil menangkis dan balik mendorong badan Juki.

“Eh dengar ye Juk, kalo lo emang jantan, harusnye lo kagak perlu ampe punye rencana nyelakain orang. Kalo lo demen ame Fatime, harusnye lo datengin rumahnye terus lo lamar deh tu Fatime buat lo jadiin bini!. Malu gue punya abang katro kayak lo, bisanye cuman ngandelin orang aje. Tunjukin dong kemampuan lo sendiri!” Ismail buru-buru beranjak pergi dari rumeh. Die khawatir malah jadi berantem ame Abangnye sendiri.

“Dasar ade sialan!” Juki memaki sambil berdiri dari jatohnye akibat didorong Mail tadi.

* * *

Malem minggu (Hari H Ahmad ketemu calon mertue)—–

Ahmad lagi berdiri berhadepan ame cermin di kamarnye, tangannye sibuk merapikan kerah baju kemeja warna birunye. Malem ini si Ahmad bener-bener kelihatan gagah. Selesai dengan penampilan, die buka lemari ngambil dompet ame jam tangan.

“Sholat Isya udeh, penampilan oke, dompet siap, henpon di kantong, sekarang tinggal pamit minta doa restu ame Nyak Babe” batin Ahmad.

Begitu Ahmad keluar dari kamar, Enyak, Babe dan Ade-adenye pademelongok ngeliatin penampilan Ahmad. Mereka kagak nyangka Ahmad bise sekeren itu.

“MasyaAllah, lu Ahmad pan, anak Enyak?” Enyaknye Ahmad rupanye pangling ame anaknye sendiri.

Maklum selama ini Ahmad penampilannye sederhana banget, kagak pernah dandan. Penampilannye nyang penting rapih, bersih, dan nutup aurat itu dah cukup katenye.

“Astagfirullah, Nyak mase kagak kenal ame aye? Kan Emak nyang ngelahirin aye.”

“Iye Mad, hari ini penampilan lo kagak seperti biasanye, lo keren banget mirip artis sinetron di tipi-tipi”. Sahut Babe si Ahmad sambil kipasan pake kipas yang terbuat dari kulit bambu.

“Ah Babe bise aje”

“Lagian lo mo kemane sih Mad?” Tanya Enyaknye lagi

“Ini Nyak, Beh, aye mo menuhin undangannye Babenye si Fatime, Babenye Fatime mo ngobrol-ngobrol gitu deh, aye minta doanye yeh Nyak, Beh” ujar Ahmad.

“Oh, iye dah, ati-ati ye di jalan. Nih Babe kasih duit buat pegangan.” Babe ngorek-ngorek isi peci itemnye.

“Mmm kagak useh Beh makasih, aye dah ada kok, Babe tenang aje hehehe” Ahmad langsung menyambar tangan Babe ama Enyaknye untuk dicium.

“Aye berangkat dulu ye, Assalamu’alaikum!”

“Wa’alaikum salam!” keluarganye Ahmad nyaut salam kompakan.

* * *

“Hop! oop, berenti di sini aje bang pinggir dikit dah tuhh deket tukang martabak”. Kate Ahmad ke tukang ojek.

“Ngiiiik”. Motor ojek mendarat tepat di depan tukang martabak. Ahmad langsung ngasih ongkosnye, “Nih bang ambil aje kembaliannye”.

“Wii alhamdulilee, makasih ye Bang, mudah-mudahan Abang rejekinye makin banyak dan selamet dunie akherat!” Tukang ojek kegirangan dikasih duit gocapan ame si Ahmad.

“Amiiiin, sama-sama makasih ye Bang ude nganterin aye dengan selamat hehehe”. Ntu Tukang ojek pun langsung ngacir sambil cengar-cengir.

Selesai beli martabak telor super spesial, Ahmad jalan kaki menuju ke rumeh pujaan hatinye. Jarak rumeh Fatimeh gak begitu jauh dari tempat die beli martabak. Tiga menit jalan santai juga udeh sampe.

“Lha, ni jalanan kok sepi banget yak? Padahal baru jam Lapan, ud pade molor kali yak? Et daah malem minggu malah pade molor, payah ni orang-orang kampung”. Ahmad ngomong sendirian sambil ngeliatin jam tangannye.

“HEI BRENTI LU!” tiba-tiba ada suara yang bikin kaget si Ahmad. Rupanya ada orang yang nyegat Ahmad sambil ngacungin goloknye.

Ni orang kostumnye mirip-mirip ninja cuman bedanya penutup kepalanye pake sarung, yah kite sebut aje ni sosok -Ninja sarung- yeh ^_^.

“Astagfirullah, iye bang aye brenti nih, cuman jangan ngunjukin golok ntu ke aye donk bang, ngerii, tar klo setan lewat gimane bang? Ah ngeri dah pokoknye”. Ahmad masih belon sadar tu ninja sarung mo nyelakain die.

“Ahh diem loh kagak usah banyak bacot!. Mo kemane loh hah?!” Ninja sarung keliatan makin garang.

“Oh ini aye mo silaturahmi ke tempat sodare bang, rumenye kagak jauh kok dari sini, ade ape ye bang kok sampe perhatian gitu ame aye?, kagak usah dianterin juge kagak ape-ape kok bang, aye tau kok jalannye, yah paling tinggal dua tikungan lagi nih” Ahmad menjawab dengan tenang sambil senyum-senyum simpul.

Ninja sarung malahan kesel karena Ahmad bukan takut malah kesannye ngeledek.

“Heh anak sialan, mendingan lo pulang deh, ato ni golok nancep di jidat lo!” Ninja sarung mulai mengancam.

Tiba-tiba Ahmad inget obrolannye tempo hari liwat henpon ame Ismail ade seperguruannye.

“Jangan-jangan ini yang dimaksud Mail kemaren siang. Tapi kalo gue nirutin maonye tu Ninja, hubungan gue ame Fatime bisa punah nih. Wah kayaknye kagak ada jalan laen selaen bertarung nih”. Ahmad membatin.

Ditarolah bungkusan martabak telor super spesial nyang masih anget di tempat yang aman, kemudian Ahmad angkat bicara.

“Bang, aye minta maap sebelumnye, tujuan aye ke kampung sini bukan untuk berbuat jahat, aye cuma mo silaturahmi ke tempat sodare aye. Jadi mohon abang ngasih aye liwat”.

“Ahhh banyak bacot lu, nih makan golok gua, Ciaaatttt !!!” Ninja sarung memulai perkelahian dengan langsung meyabetkan goloknya ke arah kepala Ahmad.

Ahmad langsung pasang kuda-kuda begitu lawannya mo nyerang. Dengan cepet die nunduk untuk menghindari golok nyang diarahin ke kepalanye.

Ahmad gak kalah jurus, walaupun lawannye bersenjatakan golok, die kagak gentar, dengan gerakan secepat kilat Ahmad ngeluarin jurus sapuan kakinye ke tu Ninja.

Sreet!” sapuan kaki Ahmad mengalir dengan sempurna ke kaki lawan. Dan “Bruuk!” Ninja sarung langsung jatoh terjerembab. Ngeliat lawan udeh jatoh Ahmad gak menyia-nyiakan kesempatan nyang ade. Die langsung tendang golok nyang dipegang lawan, “Prak!” dan berhasil. Goloknya sudah gak ada dalem kekuasaan tu Ninja.

Menyusul jurus penutup, Ahmad mengarahkan kepalan tangannye ke arah dada tu Ninja
nyang masih terkapar “Buuk!.”

“Hugh!” Sang Ninja terlihat kesakitan dan sesak nafas dihadiahi pukulan terakhir Ahmad.

“Sekarang saatnye!” ujar Ahmad dalem hati.

Segera Ahmad ngambil bungkusan martabaknye, dan lari sekenceng-kencengnye ninggalin Ninja sarung yang lagi kesakitan menuju ke rumeh Fatime.

“Ugh Ahmad, rupanye lo tangguh juge yeh!” kata Ninja sarung yang masih megang-megang dadanye, sembari ngeliatin Ahmad nyang ude jauh ngambil jurus langkah seribu alias ngabur.

“Pertarungan kite belom selesai, kite liat aje nanti, gue pasti bakalan nemuin lo, dan bikin lo mati !” Ninja sarung seolah gak terima akan kekalahan nyang die derite.

* * *

“Hh hah hh hah hhhhh” Ahmad nyoba ngatur nafasnye, sekarang die ude tiba di depan rumeh Fatime.

“Gila, hari gini masih ada aje orang yang jadi Ninja-ninjaan. Untung gue bisa lolos” ujar Ahmat sembari ngerapiin baju dan rambutnye.

“Huuff, kali ini gue bakalan nemuin pertarungan yang sebenarnya, yaitu berhadapan ame Babenye Fatime. Mudah-mudahan gak terjadi hal-hal nyang buruk ame gue nanti.”

“Ya Allah, tolonglah hamba-Mu ini. Bismillahirohmanirohiiim.”Ahmad nyoba ngumpulin keberanian. Dengan mantep masup pekarangan menuju pintu depan rumahnye Fatime.

“Assalamu’alaikuuum !” seru Ahmad mantap.

“Wa’alaikumsalaam !” akhirnye kuping aye dengar suara merdu Fatimeh ngejawab salam.

“Assalamualaikum … Be” sore ntu aye menghampiri Babe nyang lagi asik ame kebiasaanye di sore hari, yantu duduk di bawah pu’un sengon sambil di temenin rokok kterek ame kopi item kesukaanye.

“Waalaikumsalam … eh elu Fatimeh, dah pulang lu ?” aye duduk di samping Babe, sambil menemenin Babe menikmati hawa sejuk sore hari.

“Iye .. Be, aye pulang di anter ame Bang Ahmad, mangkenye gini hari aye dah nyampe rumeh” mendengar aye nyebut name Bang Ahmad, mukenye Babe langsung keliatan sepet.

Padahal ye, hubungan aye ma Bang Ahmad dah lame benget, kalo kagak saleh pas aye lulus Aliyah taun due ribu lime nyang lalu. Aye kenal ma Bang Ahmad lantaran aye di kenalin ame Nita temen ngaji aye di Ta’lim. Jujur aje nih, sebenernye aye juga dah naksir ame Bang Ahmad, eh … ujug ..ujug si Nita ngenalin aye ma Bang Ahmad, ya udeh aye seneng banget. Pas ntu rase-rasenye aye pingin terbang aje kaya kupu-kupu.

Waktu ntu yang aye tau Bang Ahmad adalah cowok kampung yang lumayan keren, klo di ajak kondangan juga kagak malu-maluin banget, biar kate orang kampung penampilan Bang Ahmad lumayan rapih, die selalu make kemeja ame celana bahan, jarang deh pokoknye aye ngeliat Bang Ahmad pake celana lepis, bukan karena si Abang kagak punya atau kagak mampu beli, tapi Bang Ahmad ngerasa kagak nyaman aje ame nyang namenye celana lepis.

“Eh … Fatimeh .. Babe mo nanya nih ye ame lu, tapi lu kudu jujur ame Babe!” Babe mematikan rokok kreteknye yang baru abis setengah batang, letak kopyahnya yang rada miring die betulin, keliatanye si Babe mo ngomong serius nih. Duh .. aye jadi deg-degan.

“Tanye ape Be?” aye makin penasaran, dan aye buru-buru ngatur napas, jaga-jaga takutnye si Babe nanya yang aneh-aneh terus asma aye kambuh pan berabe.

“Emangnye ape sih yang lu suka dari si Ahmad itu, die pan pengangguran dan nyang Babe tau die ntu cume marbot mushola. Lagian ye Fatimeh, ntu si Juki anaknye Haji Samsul juga naksir ame elu. Nah kalo elu ame die seratus persen Babe setuju.” Dengan santai Babe nyundut rokoknye lagi, malahan sekarang sambil kipas-kipas.

“Aduuhh .. Babe plis deh, masa dah gini hari masih ngejodohin anak aje, dah kagak jaman kali Be. Lagian ye Be, aye dah cinte mentok ame Bang Ahmad, aye kagak bakal berpaling ke cowok lain, cinte aye cume bakal Bang Ahmad seorang. Titik kagak pake koma.” aye buru-buru ngatur napas yang udah rada ngap-ngapan gara-gara ngedenger omongan Babe.

“Fatimeh .. Fatimeh .. ape sih yang elu arepin dari si Ahmad ntu, kerja kagak .. ape kagak. Emang si sholatnye rajin, tapi pan ntu doank kagak cukup Timeh” suara Babe yang rada ngebass bikin nyali aye ciut, duh aye jadi takut, mungkin klo ini pilem kartun di kepala Babe bakal muncul tanduk, hehheheh ….

“Ya .. ampun Be, jangan suka nilai orang dari materinye aje dong Be. Babe mau punya mantu yang kaya raya tapi agamenye keblangsak, trus sesat, kagak pernah sholat …. duh amit-amit deh Be aye si ogah.” napas aye mulai ngap-ngapan lagi, ah … untungnye Enyak dateng bawain air putih ma kue cucur.

Ah … ini lah jeleknye Babe aye, selalu ngeliat dari materi, mentang-mentang Bang Ahmad kagak punye mobil kayak si Juki, mentang-mentang Bang Ahmad kagak pernah pake dasi kayak si Juki, langsung aje deh si Babe ngecap Bang Ahmad kagak pantes buat aye. Babe kagak tau sih, kalo mobil yang suka di pamerin Juki ntu cuma mobil Bokapnye, dan kerjanya si Juki juga cuma luntang-lantung kagak jelas, soal perkara dasi yang suka Juki pake mah, ntuh cuma gegayaan die aje.

“Tau nih si Abang, dulu waktu Abang ngelamar aye, Abang juga lom kerja, lom punye ape-ape tapi lantaran Abang orangnye ulet, akhirnye aye mau ame Abang” Nyak ikutan nimbrung obrolan aye ma Babe, dan kayaknye Enyak setuju ma dedemenan aye si Bang Ahmad.

“Ah … ! rese lo Ti, nyamber aje kayak gledek.” spontan aje tampang Babe nyang tadinye serem sekarang mulai keliatan kalem, gara-gara omongan Enyak, Babe jadi rada malu ma aye.

“Be … Bang Ahmad ntu, kagak seburuk nyang Babe kira, diem-diem begitu Bang Ahmad juga punye kerjaan, nah lantaran Bang Ahmad orangye kagak sombong, mangkenye die kalem-kalem aje. Aye sediri aje baru tau tadi kalo sebenernye Bang Ahmad ntu punye penghasilan sendiri, dan yang kudu Nyak ame Babe tau, Bang Ahmad bakal ngelamar aye pake duit tabunganye sendiri. Hebat kan Be?”

Nyak ame Babe langsung adu pandang. Nyak melempar senyumanye ke aye, sementara Babe langsung nyeruput kopinye lagi ampe tandas.

“Fatimeh …. Kalo elu bener-bener dan mantep ame si Ahmad, lu bawa tu bocah kemari, Babe mo kenal dulu, Babe pingin tau ape kerjanye, Babe juga pingin tau asal usulnye tu bocah,” muke Babe yang tadi rada kecut sedikit berubah, ya .. meskipun masih kagak ada ekspresinye sama sekali.

“Jadi … Jadi Babe setuju aye kawin ma Bang Ahmad?”

“Siapa bilang Babe setuju, Babe Cuma mo tau dulu, ntu bocah orangnye gimane, kerjanye ape? Orang tuanye siape ?.” Dari pertama aye pacaran ma Bang Ahmad ampe sekarang Babe emang kagak pernah engeh ame tampang Bang Ahmad, ya .. maklum aje tiap Bang Ahmad ngapelin aye Babe selalu kagak mau nemuin, palingan cuma Enyak yang masih ade basa-basinye dikit.

“Iye deh Be, ntar aye kasih tau ke Bang Ahmad kalo Babe mau ketemu ma die. Makasih ye Be” dengan tampang yang senengnye bukan maen aye nyium tangan Babe ma Enyak.

***

“Assalamualaikum …. Bang Ahmad ye ?, ini aye bang Fatimeh”

“Waalaikumsalam … eh elu Timeh, tumben-tumbenan nelpon, kangen ye ma Abang?

“Yee .. si Abang, ke GeEran amat, ada kabar bagus Bang”

“Kabar ape Neng ?”

“Babe minte supaya Abang dateng kerumeh, Babe mo ketemu ame Abang”

“Yang bener Neng? Kapan?”

“Bener Abang sayang, kapan si aye pernah boong ame Abang. Malem minggu Bang, Ba’da Isya”

“Ok deh Neng, duh Abang jadi deg-degan gini ya”

“Bang udeh dulu ye .. koin aye dah abis neh. Dadaaah .. Abang. Salamlikum”

“Iye dah .. kumsalam”

Duh .. aye jadi kagak sabaran pingin buru-buru malem minggu, semoga aje Bang Ahmad bise ngambil Hatinye Babe. Amin.

Sore ini aye ketemuan lagi ame Fatimeh ngajak die nonton lenong di kampung Setu, sekalian aye juga pingin cerite ke die tentang kekhawatiranye selama ini.

“Neng, … neng gak tau kan, sebenernye abang tuh gak nganggur?” duh akhirnye aye buka rahasia lebih awal dah.

“Jangankan Neng, Babenye Abang aje kagak tau kalo sebenernye aye punye penghasilan.” Ya .. aye kerja di mane selama ini emang kagak ada satu orangpun nyang tau, cume aye ma Allah nyang tau.

“Yang bener bang?” tanye Fatimeh penasaran

“Jadi Abang bukan pengangguran dong?, trus Abang emangnye selama ini kerja di mane? Kok aye gak pernah di kasih tau sih ma Abang.” Duh … begini ini neh Fatimeh, kalo dah nanye berentet banyak bener, dah kayak wartawan aje.

“Sabar dong Fatimeh sayang, atu-atu nanyanye, Abang jadi bingung nih jawabnye nyang mane dulu?”

“Iye Bang maap, abis Abang sich bikin Neng penasaran,” mukenye Fatimeh jadi merah, lantaran die malu sedari tadi nyerocos mulu.

“Begini Neng, sejak lulus SMA Abang ikutan perkumpulan, namenye TANJIDOR UNITED.”

“Tanjidor United Bang? apaan lagi tuh?” Tanyanye penasaran, duh … klo Fatimeh lagi nanye sambil melongo gini, bikin aye jadi gemes aje.

“Aduuh Neng, penasaran sih penasaran tapi jangan sambil narik-narik kumis donk kan perih!” begini ini kebiasanye si Fatimeh, dari dulu ampe sekarang klo gemes ame aye … pasti kumis tipis aye nyang jadi sasaran.

“Maaapp Bang, abisnye kumis Abang lucu sich … hihihi.” Fatimeh selalu bilang kalo kumis aye ini lucu , aye juga bingung, ngapa ni kumis dari dulu ampe sekarang segini-gini aje ye, padahal aye pingin juga kumis aye tumbuh lebat kayak Abah Fuad, pan keren tuh keliatanye, kayak jawara hehheh…

“Gini Neng, semuanye berawal dari Abah Fuad nyang guru silat di kampung seberang. Sekitar 8 taon nyang lalu Abang udeh belajar silat ame Abah Fuad. Waktu ntu abang baru lulus SMA terus dua taon setelah Abang berguru ame beliau, Abang diberi kepercayaan jadi assisten di perguruan silatnye, Nah mulai dari situ Abah Fuad tiap bulan ngasih Abang uang saku”. Aye coba ngejelasin pelan-pelan ke fatimeh, ya .. maklum aje si Fatimeh ntu kadang suka tulalit, tapi cuma dikit, aslinye mah die gadis nyang cerdas, mangkenye aye cinte mentok ame die.

“Truss hubungannye ame Tanjidor United apaan Bang?” tuh .. kebuktikan kalo die gadis nyang cerdas, klo nanye aje kudu ampe detail begini.

“Ya elah sih neng kaga sabaran amat sih orangnye, ini pan lagi diceritain, jangan dipotong dulu nape,” Duh .. aye jadi gemes pingin nyubit pipinye Fatimeh, tapi jangan dah kesian, aye toel aja dah dikit.

“Iya Bang Ahmad sayaaang, maapin Neng ye .. lanjut dah Bang ceritanye!”

“Nah selain punye perguruan silat, Abah Fuad ntu juga punye group lenong namenye grup SINAR BETAWI. Di grup lenong ntu kan diiringin musik, nah Abang tuh juga ditunjuk buat niup tanjidor. Temen-temen SINAR BETAWI nyebut semua pemain musiknye ntuh TANJIDOR UNITED. Di situ pun Abang dapet duit, jadi penghasilannye dobel Neng.” Napas aye jadi ngap-ngapan lantaran cerita panjang lebar begini.

“Ooo gitu Bang!, aye seneng deh Bang dengernye, ternyate Abang bukan tipe laki-laki nyang jadi benalu di keluarga Abang,” Fatimeh tersenyum bangga ke aye, sampe-sempe bikin aye ke GeEran.

“Selama ini Neng, Abang tuh udeh nabung, yah lumayanlah cukup buat biaya ngelamar Neng dan juga buat biaya hidup kite berdua sehari-hari. Dan nyang bikin Abang makin yakin buat ngelamar Neng adalah karena kemaren Alhamdulillah Abang diterime kerje jadi guru agama di Yayasan Raudlatul Jannah.”

“Oo Yayasan nyang deket kelurahan ntu Bang?.” Tanye Fatimeh buat memastikan

“Iye, tapi di TPA-nye Neng, ya doain aja moga-moga ntar Abang bisa juga ngajar di Madrasahnye.”

“Duuh bangganye aye denger Bang Ahmad tercinte pinter nyari penghasilan. kagak sie-sie selama ini aye setia ame Abang” sangking bangganye ke aye, nyaris aje si Fatimeh mo meluk aye, untungnye die langsuung inget kalo kita belum jadi muhrim, padahal aye dah mo nanggepin pelukanye Fatimeh, hehehh ..

“Oh iye Neng, hari ini Abang gak nganter sampe masuk rumah ye, Abang agak buru-buru, Abang ada janji ame Abah Fuad. Ini dah telat 5 menit, gawat nih klo ampe Abah marah tar Abang di kepret pecinye lagi.”

“Iyeeee Abang ganteng, kagak ape-ape kok, aye ngarti Bang lagian rumeh aye pan dah gak jauh tuh. Ntar aye jalan sendiri aje deh.” Ah … Fatimeh emang tipe cewek idaman, die selalu bise ngertiin aye.

“Neng pan kite dah lame kenal ye…, Abang juga dah cinte bener ma Eneng.Neng, gimana kalo Abang dateng kerumeh nemuin Nyak ame Babenye Eneng.”

“Hah …!! apaan Bang? Abang mo ngelamar aye ?”, aye tekejut kaget juga denger omongan si Abang barusan, rasenye jantung aye ampe mo copot. O mai god orang Londo bilang, die mo ngelamar gue.

“Neng … neng … ye… si eneng malah melongo begitu, gimana ini?, Neng mau kagak kawin ma Abang?” si Abang ngegerakin dua tangannye di antara matanye ame mate aye.

Aye bener-bener gerogi. Di tengah getaran tangannye, aye paksain buat ngejawab spontan “Iye .. Bang aye mau, aye mau banget kawin ma Abang.” Walhasil si Abang loncat jungkir balik, jingkrak kegirangan. Kelakuanye udah mirip kaya orang kesurupan.

“Oke deh ..Neng, bulan depan Abang kerumeh ye, ngajak Enyak ame Babenye Abang buat ngelamar Eneng”. Aduh .. aduhh .. aye senengye setengah mati denger omongan si abang, berasa lagi mimpi aje.

******

Besok paginye aye bangun pagi-pagi bener, aye kagak mo kalah ma ayam jagonya Kong Ubay yang tiap pagi bekokok. Celingak- celinguk aye nyelongok ke luar lewat jendela. Ah .. ternyate Matahari juga lom muncul. Nih pagi aye udeh bertekat bakal ngomong ame Babe soal rencana Bang Ahmad tempo hari.

Aye liat Babe masih asik ngebaca koran nih hari, sementara Enyak baru aje dateng dari dapur sambil bawa nampan yang isinye secangkir kopi. Rutinitas yang asik menurut aye. Koran ame kopi di pagi hari, Qur’an ame Qorie di malem hari. Ya .. begitu dah Nyak ma Babe aye, selalu kayak gitu dari dulu, Nyak ame Babe keliatanye akur mulu, jarang berantemnye.

“Nyak, Babe ade nyang mau aye sampein neh”. Babe nyeruput kopi dengan bibirnye yang udah rada keriput. Babe rada nurunin dikit lembar koranye, trus matenye ngelerik sedikit kea rah aye. Sementare enyak sendiri khusyu banget ame catetan belanjaanye. Sambil nunggu respon dari Babe aye duduk diem di pojokan dah kaya anak kucing kesiram aer.

“Mau ngomong apaan lu, serius amat tampang lu,” suare Babe yang rada ngebas bikin jantung aye mo lompat, duh … bikin aye kaget aje. Sementara mata Babe natap tajem kearah aye anak cantik kesayangannye. (bukanye aye narsis, tapi ini kenyataan .. hehhe )

Keliatanye Enyak ame Babe udah siap bener nyimak pembicaraan aye. “Gini Be, anu …. Emm ..” duh gimane nih, susah bener mo nyampein kabar baik ini. Kabar yang aye anggep amat sangat nyenengin hati aye, tapi … kagak tau dah kalo menurut Nyak ame Babe. Karena ampe sekarang yang aye tau Babe masih kurang suka ame dedemenan aye.

“Anu … anu, anu apaan, kalau mau ngomongn yang bener Neng, jangan bikin Nyak ame Babe keblingsatan begini gara-gara penasaran ma omongan lu !.”

“Begini Nyak, Babe, tempo hari aye abis jalan ame Bang Ahmad. Trus Bang Ahmad bilang die mau ngelamar aye.” Aduh .. nih Jantung tiba-tiba dag dig dug, dah kayak bunyi beduk.

“Bang Ahmad minta supaya aye ngomongin masalah ini terlebih dahulu ke Babe, karena Insyaallah bulan depan orantuenye Bang Ahmad bakal kemari buat ngelamar aye.” Babe masih aja diem die langsung nyeruput sise kopinye ampe ludes. Sementara Enyak, cume senyam-senyum sambil ngeliatin aye, anak perawan atu-atunye. Aye tunggu jawaban Babe 1 detik, 2 detik …. 1menit, 2 menit …. Eetttt dah si Babe masih tetep diem aje.

Duh … !! ya udeh deh “Nyak, Babe .. aye berangkat kerja dulu ye.” Sekali lagi aye nengok ke Babe berharap supaya Babe mau ngesrpon omongan aye soal niat Bang Ahmad yang mau ngelamar aye. Tapi Nihil setelah aye nyium tangangnye, Babe tetep milih diem.

*****

“Gimana Neng, udah ngomong ame Babe tentang rencana Abang?” Bang Ahmad nanyain lagi soal ini Kayak-kayaknye Bang Ahmad bener-bener pingin ngelamar aye.

“Aye udah omongin semua ke Babe tentang rencana Abang, tapi Babe belom ngasih tanggapan Bang, Babe keliatan cuek aje.” Bang Ahmad cuma senyam-senyum. Tapi terus terang aye sendiri kagak ngerti ame maksud senyuman si Abang. Sejauh ini Bang Ahmad adalah laki-laki yang paling bae yang pernah aye kenal, die juga sangat sabar, sholat lime waktunye kagak pernah ketinggalan barang atupun.

“Bang, gimane kalo Babe kagak nerime lamaran Abang ?” Aye coba menanyakan kemungkinan buruk ini ke Bang Ahmad. Karena kayaknye Babe kurang suka ame Bang Ahmad lantaran sampe saat ini Bang Ahmad masih nganggur.

“Neng percayakan sama abang ?” Aye ngangguk jawab pertanyaan Bang Ahmad.

“Nah .. kalau Neng udah bisa percaya ame Abang, Insyaallah semuanye bakal lancar, Neng berdoa aje ye dan coba terus kasih keyakinan same Babe, kalau Abang bener-bener serius ame Eneng.”

“I Love you Abang”. Aye lemparkan senyuman paling manis yang aye punye bakal Bang Ahmad tersayang. dan dalam hatipun aye pun bermunajat kepada-Nya.

Puisi ini untuk kawanku di sudut Surabaya Sana, Gheta Pratama … ini untukmu ^_^
Dengan satu kawan aku lepas tertawa
…….menangis meraung
…….lepas mengadu
…….tak enggan mengeluh

Ia hanya seorang yang tersembunyi
Bukan tong sampah
Tapi memang tempat membuang kesah

Lalu aku meratap
Dan menjadi gila bersama
Dalam bahak yang tak pernah usai

Jakarta,130907
saat manusia2 lain sibuk berhadapan dengan tuhanya.